Change Center

قبل ما تضايق من عنوان البوست تعالى أحكيلك بيجي في دماغك ايه لما بتلاقي الدنيا صعبه معاك :

١- أحمد زويل عمره ما كان هيبقي أحمد زويل غير لو سافر ودرس واتعلم وكمل بره

٢- محمد صلاح عمره ما كان هيبقي بشهرته ونجوميته دي غير لو كان خرج من البلد
٣٣- الشاب في الدول الاجنبيه اول ما بيفكر بيفكر ازاي يحقق احلامه وهنا الشاب بيفكر ازاي يجيب النيش و يحوش تمن الشقه
٤٤- الاسعار بتزيد و احنا مش لاقيين ناكل والمرتبات زي ما هي فمفيش وقت نعمل حاجه جديد ولا نفكر في حاجه جديده
٥- معظم الناجحين في البلد يا بدأوا معاهم فلوس يا معاهم واسطه ومسنودين غير كده مش هتعرف تبدأ
٦٦- أنا بشتغل وبيطلع عيني في الشغل وباخد ملاليم في الآخر

كل الكلام ده بنسبه كبيره حقيقي وفعلا زويل وصلاح مكانوش هيكونوا كده لو كملوا في مصر بس احنا مبنسألش نفسنا كانوا ايه قبل ما يخرجوا من مصر، كام طالب ماجستير ودكتوراه بيخرج يدرس في امريكا كل سنة و كام لاعب بيخرج يحترف بره، ليه مبنسألش زويل كان مؤهلاته ايه قبل ما يسافر ؟!!

تعالى أحكيلك زويل اول مره يسافر امريكا كان محقق ايه في مصر : زويل دخل كلية علوم في مصر ومجموعه في ثانويه عامة ممكن مكانش عالي بس هو موقفش عند كده، اتخرج من كلية علوم جامعة اسكندريه بامتياز ومرتبة شرف واشتغل معيد في الجامعه وعمل ماجستير في علم الضوء وبعدها دور علي بعثة انوا يسافر يكمل دكتوراه هناك. كام واحد في مصر بيتعب علي نفسه انوا ينجح في دراسته و يكمل ماجستير ويدور علي فرصه أكبر ورا كل انجاز بيحققه.

هيجي سؤال في دماغك : كل واحد له ظروفه والتعليم زمان غير التعليم دلوقتي !! ،، معاك حق جدا، هو فعلا التعليم زمان غير التعليم دلوقتي، التعليم زمان مكانش فيه مواقع تعليمية عالانترنت كانك بتدرس في الجامعه بالظبط وانت في بيتك، التعليم زمان مكانش فيه مواقع تعلمك كل حاجه من الابره للصاروخ في أي مجال، التعليم زمان مكانش فيه يوتيوب وجوجل تدور عليهم اي حاجه في خيالك تطلعلك. التعليم زمان كان مقفول علي الجامعه والمدرسه ومكانش فيه مراكز تدريب تقريبا في كل شارع بتمشى فيه.

الفرص دلوقتي أكتر بكتير من زمان لو عايز تتعلم أي حاجه أو تطور من نفسك.

لو انت حاسس انك مظلوم في البلد ففيه ناس كتير بتقبض بالدولار ملهاش علاقه بالدولار زاد او نقص لانهم شغالين في مواقع عمل حر عالانترنت أو انهم بالكفاءه انهم يشتغلوا في شركات اجنبيه تقبضهم بالدولار أو حتى بيقبضوا بالمصري بس المرتب اللي يطلبوه عشان لو الشركه معملتش كده هيسبوها ويروحوا مكان يديهم حقهم اللي يرضيهم.

الناس دي شغاله بمبدأ انك مش رايح الشركه تحلبها وتاخد فلوسك أخر الشهر وده اول حاجه بتفكر فيها، الناس دي ماشيه بمبدأ انها تكسب الشركه اللي هي فيها عشر قروش قبل ما تكسب هي من الشركه قرش، مبدأ ان العالم بيتقدم ولازم نتقدم بنفس السرعه والا هنتاخد في الرجلين ومحدش هيسمي علينا

لو مش مصدقني فيه نماذج كتير حواليك خريجين خدمه اجتماعيه و معاهد صناعي وكليات هندسه بس مكتفوش بده، فيه اللي قعد يذاكر عشر شهور عشان بس يتقبل في جوجل وعملها، وفيه اللي قعد يتعلم برمجه واشغل علي مواقع العمل الحر وساعته بخمسين دولار دلوقتي يعني الف جنيه في ساعه شغل واحده وهو عايش معاك في مصر وشاب في العشرينات كمان كل رأس ماله وقته و اللابتوب وانترنت ( ايوه الانترنت البطئ ده

لو بتقبض الف ونص في الشهر أو الفين أو خمستلاف أو عشرتلاف، ومستني تزيد عشان انت اقدم او انت اكبر في السن او انت معاك سنين خبره اكتر، السوق دلوقتي مبقاش يعترف لا بخبره السنين ولا بعمرك وممكن فعليا ابنك يتقبل في وظيفه وانت لا وممكن يشتغل في نفس شركتك بمرتب ضعف مرتبك بس عشان هو مقالش انا مظلوم ، قال انا هاخد حقي

الوقت اللي محاسب بيقبض الف جنيه وبيشتكي أو محاسب خبره عشرين سنة بيقبض اربعتلاف وخمستلاف وحاسس انوا مظلوم، في نفس الوقت ده محاسب تاني اتعلم انجليزي و خد شهادات في المحاسبة واتعلم انجليزي صح و كومبيوتر صح ومرتبه ممكن يكون عشر أضعاف الأولاني مع انهم ممكن يكونوا خريجين نفس الدفعه

الوقت اللي فيه متخصص في التسويق بياخد الفين جنيه ومتضايق فيه شخص تاني بيسعى انوا يطور نفسه و يدخل في مجالات جديده في التسويق ويتعمق فيها و بيدرس و متابع كل جديد بينزل وده بينعكس على آدائه و علي الأرباح اللي بيرجعها لشركته وبالتالي مرتبه بيكون أضعاف ونسبته من الأرباح دي ممكن تخليه يقبض في شهر اللي بيقبضه التاني في سنة كامله.

المقالة دي عشان نقولك 2017 مش هتبقي أحسن لوحدها، لازم تتعب علي نفسك وتقوم تاخد حقك بنفسك ولما تيجي مقالة 2018 تكون بتحكيلنا عن انجازاتك اللي حققتها لما بدأت تتحرك

كلنا مظلومين بس فيه اللي بياخد حقه ومبيسكتش وفيه اللي خايب !!

متزعلش من كلمة خايب انت مش خايب بس اتعلم و خد حقك

شارك اصدقائك المقالة يمكن تكون سبب ان حد يتحرك و ياخد حقة